Эмгек министрлиги: коомдук акы төлөнүүчү жумуштарда иштегендердин саны 22%га өстү

Эмгек, социалдык камсыздоо жана миграция министрлиги 2025-жылдын 1-июнуна карата ишке орноштуруу кызматтары 3297 жумушсуз жарандарды кесиптик окууга жибергенин билдирди.

Бул иш-чара жумушсуздардын эмгек рыногунда атаандаштыкка жөндөмдүүлүгүн жогорулатууга жана суроо-талапка ээ болгон кесиптерди эске алууга багытталган.

Окутуу эң көп талап кылынган адистиктер боюнча өткөрүлдү: компьютердик оператор, сатуучу, ашпозчу, косметолог, чач тарач, маникюр, массажист, визажист, котормочу, бухгалтер, унаа айдоочу, электр жана газ менен ширетүүчү, сантехник, тигүүчү, балчы.

Кошумчалай кетсек, 2025-жылдын 1-июнуна карата акы төлөнүүчү коомдук жумуштарга 4537 жумушсуз убактылуу тартылган, бул өткөн жылдын ушул мезгилине салыштырмалуу (3550 адам) 22%га көп.

64 жаран жумушсуздук боюнча жөлөк пул алат. Министрлик жумушсуздарды колдоо жана алардын эмгек рыногунда мүмкүнчүлүктөрүн жогорулатуу үчүн кесиптик көндүмдөрдү өнүктүрүү боюнча иштерди улантууда.