Дайыма бирөөнүн көзөмөлүнө муктаж болгон 6460 майыптыгы бар балага 6387 жеке ассистент социалдык кызматтарды көрсөтүп жатат

Бүгүнкү күндө дайыма бирөөнүн багуусуна жана көзөмөлүнө муктаж болгон 6460 ден соолугунун мүмкүнчүлүгү чектелүү балага 6387 жеке ассистент социалдык кызматтарды көрсөтүп жаткандыгын Эмгек жана социалдык өнүгүү министрлиги маалымдайт.

Баланын үй-бүлөнүн курчоосунда болуу укугун камсыз кылууга жана өз алдынча кыймылдай албаган, майыптуулуктун оор формасындагы  балдардын ата-энелерине колдоо көрсөтүү максатында жеке ассистенттин жаӊы кызматы Кыргызстанда 2019-жылдын 1-январынан тартып  кирген. Жеке ассистент баланы багууда социалдык-турмуштук  кызматтарды көрсөтүүдөн сырткары, балага реабилитациялоонун жеке программаларын ишке ашырууга көмөктөшөт.

Жеке ассистенттин ай сайын кызмат акысынын көлөмү 4900 сомду түзөт. Белгилей кетсек, жеке ассистенттер үчүн ыктыярдуу патент жана камсыздандыруу полиси райондук социалдык өнүгүү башкармалыктарынын кызматкерлери тарабынан республикалык бюджеттин эсебинен алынат.