Эмгек министри Кудайберген Базарбаев Кыргызстан менен Германиянын иш менен камсыз кылуу жаатында кызматташуусун талкуулады

Бүгүн, 4-августта, эмгек, социалдык камсыздоо жана миграция министри Кудайберген Базарбаев Германиянын ИИМине караштуу федералдык Өкмөттүн миграциялык макулдашуулар боюнча Атайын өкүлү Йоахим Штампы менен кыргыз-герман кызматташтыгынын артыкчылыктуу багыттарын талкуулады.

Жолугушууга ошондой эле иш менен камсыз кылуу боюнча федералдык агенттиктин башчысы Зигфрид Баумлер, Федералдык канцлериянын тышкы миграция саясаты бөлүмүнүн башчысы Александр Юнг катышты.

«Эмгек министрлигинин артыкчылыктуу милдети болуп Кыргыз Республикасынын Президенти С.Н.Жапаровдун коопсуз эмгек миграциясы үчүн шарттарды уюштуруу жөнүндө жарлыгын ишке ашыруу саналат. Жыл башынан бери 11 миңден ашык адам чет өлкөлөрдө ишке орноштурулду. Чет өлкөдө иштеп, кайтып келгенден кийин кыргыз эли өз өлкөсүнө инвестиция салып, кайтып келгенден кийин өз өлкөсүнө инвестиция салып, алган билимдерин жана көндүмдөрүн өз ишин ачуу үчүн колдонуп жаткан оң динамиканы көрүп турабыз.

Президент С.Н. Жапаров Германиянын Президенти Вальтер Штайнмайер менен жакында болгон жолугушуусунда да иш менен камсыз кылуу жана кесиптик билим берүү тармагында кызматташуунун маанилүүлүгү жөнүндө айтты.

Бүгүнкү күндө биз эмгек миграциясынан кайтып келген кыргызстандыктарды ишке орноштурууда жана кесиптик багыттоодо жардам бере турган 10 кесиптик багыт берүү борборун жабдууда колдоого муктажбыз. Кесиптик багыт берүү жана ишке орноштуруу жаатында кызматташуу GIZ аркылуу ишке ашып, бул жылы Кыргызстанда ишин аяктап жатат. Ошол эле учурда биз кызматташууну улантууга кызыкдарбыз, бул тууралуу мен буга чейин Бундестагдын өкүлдөрү менен жолугушууда айттым», — деди Кудайберген Базарбаев.

КРнын Германия Федеративдүү Республикасындагы Атайын жана Ыйгарым Укуктуу Элчиси Өмүрбек Текебаев да мыйзамдуу ишке орношуунун маанилүүлүгүн белгиледи.

“Кыргызстандыктарга виза берүүнү жөнөкөйлөштүрүү биздин жарандардын Германияда мыйзамдуу ишке орношуу мүмкүнчүлүгүн кеңейтүүгө жардам берет. ГФРда билим, тажрыйба алуу мүмкүнчүлүгү биздин өлкө үчүн социалдык-экономикалык мааниге ээ, ошондой эле жаштарга жеке өсүү жагынан жардам берет”, – деди ал.

Эки өлкө тең Германияда кыргызстандыктарды мыйзамдуу ишке орноштурууну уюштурууга, жумуш менен камсыз кылуу жана кесиптик окутуу боюнча биргелешкен долбоорлорду ишке ашырууга кызыкдар экендиги белгиленди.