Эмгек министринин орун басары Баткен районундагы башталгыч мектептин ачылышына катышты

Эмгек, социалдык камсыздоо жана миграция министринин орун басары Жылдыз Полотова Ак-Сай айылындагы Көк-Таш айылындагы башталгыч мектептин ачылышына катышты.

Мектеп 100 орунга ылайыкталган.

Иш-чарага жергиликтүү бийлик өкүлдөрү, аксакалдар жана айыл тургундары катышты.

«Жылдын башында КР Президенти Садыр Жапаров 100 жаңы мектеп куруу боюнча тапшырма берген. Бүгүн биз алардын бирин ачып жатабыз.

Өз кезегинде Эмгек жана социалдык камсыздоо министрлиги бардык мектеп бүтүрүүчүлөрү келечекте жумушка орношуусу үчүн аракеттерди көрүп жатат. Калкты иш менен камсыз кылуу жана ишкерликти колдоо багытында ар кандай долбоорлор ишке ашырылып жатат», – деди Жылдыз Полотова.

Министрдин орун басары балдарды жана алардын ата-энелерин жаңы мектептин ачылышы менен куттуктап, жаш окуучуларга инсан катары калыптанышын каалады.

«Биз улуу мекендешибиз Исхак Раззаковдун билимге болгон умтулуусу менен мамлекеттик ишмер болууга жардам берген үлгүсүн билебиз. Сиздер дагы ийгиликтүү адамдар болуп өсүп, өзүңүзгө жаккан нерсени таба аласыз деп ишенем. Ал эми мамлекет өз кезегинде сиздердин билим алып, бейпил жашоого шарт түзүп берүү үчүн бардык аракеттерди көрүп жатат», – деп баса белгиледи ал.