Эмгек министрлиги: Жеке ассистенттердин кызмат көрсөтүүлөрү үчүн акы төлөмү көбөйтүлдү

Эмгек, социалдык камсыздоо жана миграция министрлигинин маалыматы боюнча, 2024-жылдын 1-июлунан тарта жеке ассистенттердин төлөмү 6 268 сомдон 7 681 сомго чейин көтөрүлдү.

“Жеке ассистент” кызматы 2019-жылдан баштап туруктуу бирөөнүн багуусуна жана көзөмөлүнө дайыма муктаж болгон, майыптыгы бар балдарга көрсөтүлөт.

Ошондой эле КР Президенти С.Н.Жапаровдун Жарлыгы менен 2022-жылдын 1-июнунан тартып жеке ассистенттин кызматы бала кезинен баштап биринчи топтогу (18 жаштан улуу) майыптыгы адамдар үчүн киргизилген.

2022-жылдын 1-июнунан тарта жеке ассистенттердин акысы 4900 сомдон 6268 сомго чейин көбөйтүлгөн.

2024-жылдын 1-июлуна карата бул кызмат 9 532 бала жана 5 316 бала кезинен I топтогу майыптыгы бар адамдарды камтыйт (жалпы 14 848 адам).

Азыркы учурда өлкө боюнча жеке ассистент кызматын көрсөтүп жаткан жарандардын саны 14 537 адамды түзөт.