2024-жылы Эмгек министрлигине 12 миңге жакын кайрылуу келип түшкөн

2024-жылдын жыйынтыгы боюнча Эмгек, социалдык камсыздоо жана миграция министрлигине жазуу жүзүндө жана коомдук кабылдама аркылуу 11617 кайрылуу келип түшкөн. Анын ичинен 1370 жазуу жүзүндөгү кайрылуулар, алардын дээрлик 97% ы мөөнөтүндө аткарылган.

Кайрылуулардын негизги бөлүгү мамлекеттик жөлөкпулдарды жана акчалай компенсацияларды дайындоо, майыптыгы бар адамдар үчүн турак-жай менен камсыз кылуу, медициналык-социалдык эксперттик комиссиялардын иши, социалдык жөлөкпулдарды жогорулатуу, иш менен камсыз кылуу жана башка маселелерге тиешелүү болду.

Көбүнчө Бишкек шаарынын, Чүй, Ош жана Жалал-Абад облустарынын тургундары кайрылышкан. Андан кийин Ысык –Көл, Нарын, Баткен жана Талас облустары турат.

Ведомство өзүнүн компетенциясына кирген бардык суроолор боюнча 0312 66-01-07 номери же 1966 кыска номери аркылуу коомдук кабылдамада мыйзамдарга ылайык түшүндүрүү иштерин жүргүзөт.

Аймактардагы жашоочуларга ыңгайлуу болуш үчүн министрликтин жетекчилигине онлайн-видеобайланыш аркылуу кайрылуу мүмкүнчүлүгү каралган.

Коомдук кабылдама иш күндөрү саат 09.00-18.00 го чейин иштейт.

Эмгек, социалдык камсыздоо жана миграция министри Равшанбек Сабиров ар жума күнү саат 9.00 дөн 11.00 гө чейин, министрдин орун басарлары иш күндөрү саат 10.00 дөн 12.00 гө чейин алдын ала жазылуу боюнча кабыл алат.