Равшанбек Сабиров: Эмгек министрлиги калктын аярлуу катмарына жардам көрсөтүү үчүн кайрымдуулук уюмдары менен кызматташууну кеңейтүүнү пландоодо

Бишкек шаарында Кыргыз Республикасынын Эмгек, социалдык камсыздоо жана миграция министрлиги менен Катар кайрымдуулук уюмунун Кыргыз Республикасындагы филиалынын ортосунда кызматташуу жөнүндө Меморандумга кол коюлду.
Документке Кыргыз Республикасынын Эмгек, социалдык камсыздоо жана миграция министри Равшанбек Сабиров жана Катар кайрымдуулук уюмунун филиалынын аткаруучу директору Абдулкадир Аль Имам Аль Башир кол коюшту.
Меморандумдун максаты-социалдык жардам чөйрөсүндө өнөктөштүктү бекемдөө, ошондой эле балдарды, майыптыгы бар адамдарды, аз камсыз болгон жана башка муктаж жарандарды колдоого багытталган программаларды ишке ашырууга көмөктөшүү.
Кызматташуу Катар кайрымдуулук уюмунун филиалы тарабынан каржыланган кайрымдуулук программасынын алкагында ишке ашырылат.
Кыргыз Республикасынын Эмгек, социалдык камсыздоо жана миграция министри Равшанбек Сабиров Абдулкадир Аль Имам Аль Башир мырзага Кыргызстандын социалдык долбоорлоруна көп жылдык колдоосу жана активдүү катышуусу үчүн ыраазычылык билдирди. Ал оор кырдаалга кабылган адамдардын жашоосун жакшыртууга багытталган иштин маанилүүлүгүн белгиледи.
“Биздин жалпы максатыбыз-жардамга муктаж адамдарды колдоо. Сиздин жардамыңыз менен биз 650 майыптар коляскасын, анын ичинде 50 электр, тигүүчү машина, 10 жүк ташуучу унаа, кийим-кече, жууркан, ашканага керектүү комплекттер жана тегирмендерди алдык. Бул маанилүү жардам жана камкордукка муктаж болгондордун жашоо шартын бир топ жакшыртат. Министр катары калктын аярлуу катмарына натыйжалуу жардам көрсөтүү үчүн эл аралык кайрымдуулук уюмдары менен кызматташууну өнүктүрүү боюнча ишти күчөтүүгө ниеттенип турабыз.
Кол коюлган меморандум биздин мамилелерди бекемдөөдөгү маанилүү кадам болуп саналат жана биргелешкен демилгелер үчүн жаңы горизонтторду ачат”, — деп белгиледи Равшанбек Сабиров.