Эмгек министрлигинин РФдагы өкүлчүлүгү 15 жаштагы кыргыз жаранына колясканы тапшырды

Кыргыз Республикасынын Эмгек, социалдык камсыздоо жана миграция министрлигинин Россия Федерациясындагы өкүлчүлүгү Россияда жашаган 15 жаштагы Кыргызстандын жараны Т.Зга майыптар коляскасын тапшырды.

Бул иш-чара чет өлкөдө оор турмуштук абалда калган кыргызстандыктарга туруктуу колдоо көрсөтүүгө, ошондой эле баланын жашоо сапатын жакшыртууга, эркин жүрүү мүмкүнчүлүгүн камсыздоого жана социалдык интеграцияга көмөк көрсөтүүгө багытталган.

Өкүлчүлүк чет өлкөдө жашаган Кыргызстандын жарандарынын социалдык камсыздоо деңгээлин жогорулатуу жана жаңы шарттарга адаптациялоодо ар тараптуу жардам көрсөтүү боюнча активдүү иш алып барууда.

«Биз муктаж болгон бардык жарандарыбызга, өзгөчө мүмкүнчүлүгү чектелген балдарга жардам көрсөтүүгө умтулабыз. Кыргызстандын ар бир жараны, жашаган жерине карабастан, өз өлкөсүнөн жардам ала аларына ишениши керек», — деп билдирди Кыргыз Республикасынын Эмгек, социалдык камсыздоо жана миграция министрлигинин Россиядагы өкүлчүлүгүнүн жетекчи орун басары Майрам Мамбетова.