КР Эмгек министрлигинин жетекчиси Россиянын Ички иштер министрлигинин өкүлдөрү менен миграция тармагындагы көйгөйлүү маселелерди талкуулады

Эмгек министри Равшанбек Сабиров Россиянын Ички иштер министрлигинин миграция маселелери боюнча Башкы башкармалыгынын башчысы Валентина Казакова менен жолугушту.

Сүйлөшүүнүн жүрүшүндө Валентина Казакова Россия Федерациясынын Президенти В.В.Путиндин 2024-жылдын 30-декабрындагы Жарлыгына ылайык Россияда жүргөн кыргызстандыктарды мыйзамдаштыруу боюнча орус тараптын учурдагы иштери тууралуу айтып берди.

Равшанбек Сабиров өз кезегинде Кыргыз Республикасынын жарандарынын укуктук статусун жөнгө салууда келип чыгуучу бир катар көйгөйлүү маселелерди белгиледи. Ошондой эле кыргыз тарап РФ Өкмөтүнүн “Россия Федерациясына кирүү жана чыгуу эрежелерин жана шарттарын апробациялоо боюнча эксперимент жүргүзүү жөнүндө” токтомуна байланыштуу тынчсыздануусун билдирди, ага ылайык чет өлкөлүк жарандар Россияга кирүү жана болуу максаттары жөнүндө 72 саат мурун кабарлоосу зарыл.

Россия тарап кыргыз делегациясы тарабынан айтылган бардык суроолорго кеңири жоопторду берди. Жолугушуунун жыйынтыгы боюнча тараптар Россия Федерациясынын аймагындагы укуктук статусту жөнгө салуу боюнча КР жарандарын маалымдоо боюнча биргелешкен ишти 2025-жылдын 30-апрелине чейин улантууну макулдашышты.