Министр Равшанбек Сабиров Кыргызстан аялдарын 8-Март майрамы менен куттуктады

Бүгүн, 6-мартта, 8 – март Аялдардын эл аралык күнүн жана Кыргыз Республикасынын аялдар кыймылынын 100 жылдыгын майрамдоонун алдында Эмгек, социалдык камсыздоо жана миграция министрлигинин демилегеси менен Бишкек шаарынын мэриясы менен биргеликте “Аялдардын лидерлиги: жаңы доордогу жетишкендик-100 жыл” аттуу салтанаттуу иш — чара болуп өттү.

Чакырылгандардын катарына эл аралык жана өкмөттүк эмес уюмдардын өкүлдөрү, активист  жана лидер аялдар, мамлекеттик жана муниципалдык кызматтын өкүлдөрү кирди.

Иш-чара Кыргыз Республикасынын Президенти С.Н.Жапаровдун атынан Мамлекеттик катчы Сүйүнбек Касмамбетов окуп берген куттуктоо сөзү менен башталды. Ошондой эле Жогорку Кеңештин төрагасы Нурланбек Тургунбек уулу куттуктоо сөзүн айтты.

Чыгып сүйлөгөндөр аялдар кыймылынын 100 жылдыгынын алкагында аялдардын лидерлигинин маанилүүлүгүн, аялдардын коомдук өнүгүүгө кошкон салымын, ошондой эле мамлекеттин жана коомдун аялдардын укуктарын жана мүмкүнчүлүктөрүн кеңейтүүгө көмөктөшүүгө болгон умтулуусун белгилешти.

Эмгек, социалдык камсыздоо жана миграция министри Равшанбек Сабиров куттуктоо сөзү менен чыгып, аялдар – бардык тармакта: үй-бүлөдө, жумушта, илимде, саясатта, билим берүү жана бизнесте прогрессти жылдыруучу зор күч экенин белгиледи.

“Бул жылы биз аялдар кыймылынын 100 жылдыгын белгилеп жатабыз. Бул убакыт аралыгында аялдар теңдик, укуктар жана мүмкүнчүлүктөр үчүн күрөшүп, бүгүнкү туруктуу коомго карай узак жолду басып өтүштү. Аялдардын кыймылы биздин өлкөдө да, дүйнө жүзү боюнча да көптөгөн позитивдүү өзгөрүүлөрдү жаратты” деди ал.

Ата-бабаларыбыз бизге кыргыз аялдарынын улуулугунун жана күчүнүн символуна айланган Чыйырды, Каныкей, Айчүрөк, Жаңыл Мырза, Кыз Сайкал жана Курманжан Датканын образдарын калтырышкан. Алардын элестеринен үлгү алып жүргөн бардык аялзатка – таазим! “,- деди ал.

Эмгек министри жыл сайын гендердик теңчиликти камсыз кылуу боюнча демилгелерди илгерилетүү боюнча олуттуу жылыштар болуп жатканын белгиледи. “Көбүрөөк аялдар саясатта, башкарууда жана бизнесте лидер болуп жатышат.

Бул алардын талыкпаган эмгегинин жана жынысына карабастан ар бир адамдын өзүн ишке ашыруу үчүн бирдей мүмкүнчүлүктөрү бар коомду түзүүгө чын ыкластан умтулуусунун натыйжасы. Биздин негизги максатыбыз – ар бир аял өзүн коопсуз сезе турган, келечекке ишенимдүү карап, бизди жаңы ийгиликтерге шыктандырган шарттарды түзүү”, – деп жыйынтыктады Равшанбек Сабиров.