Кыргыз Республикасы Нью-Йорк шаарындагы БУУнун аялдардын абалы боюнча комиссиясынын 69-сессиясында гендердик теңчилик чөйрөсүндөгү прогресс жөнүндө баяндама жасады

Кыргыз Республикасынын делегациясынын башчысы, Кыргыз Республикасынын Эмгек, социалдык камсыздоо жана миграция министри Р.А. Сабиров БУУнун аялдардын абалы боюнча комиссиясынын 69-сессиясында өлкөнүн гендердик теңчилик жана аялдардын укуктарын кеңейтүү жаатындагы жетишкендиктери менен тааныштырды.

Министр өз сөзүндө Кыргызстан туруктуу өнүгүү максаттарынын (ТӨМ) глобалдык рейтингинде 45-орунду ээлеп, № 5 – максатына-гендердик теңчиликти камсыз кылууга өзгөчө көңүл бурарын баса белгиледи. Ушундан улам, өлкөнүн калкынын жарымынан көбү анын социалдык-экономикалык өнүгүүсүнө активдүү катышат.

Мамлекеттик саясаттын негизги багыттарынын бири аялдарга карата зомбулукка каршы күрөшүү, аялдардын ишкердигин колдоо жана аялдардын экономикалык мүмкүнчүлүктөрүн кеңейтүү болуп саналат. Бул контекстте министр өлкөдө Кыргыз Республикасынын Президенти Садыр Нургожоевич Жапаровдун аялдарга карата зордук-зомбулукка жол берилбештиги жөнүндөгү талабы ишке ашырылып жатканын белгиледи. Бул саясат аялдардын укуктарын коргоо жана алардын өзүн-өзү ишке ашыруусу үчүн жагымдуу шарттарды түзүү боюнча системалуу чараларды кабыл алууга көмөктөшөт.

Кыргызстан ЭЭУнун Эмгектеги зомбулукту жана куугунтуктоону жоюу боюнча №190 конвенциясын ратификациялаган биринчи өлкө болду. Кошумчалай кетсек, өлкөдөгү ишкерлердин 40%ын аялдар түзөт, алар үчүн атайын мамлекеттик колдоо программасы ишке ашырылууда.

Кыргыз Республикасынын Жогорку Кеңешинде депутаттардын 22 пайызын аялдар түзсө, жергиликтүү кеңештерде бул көрсөткүч 42 пайызга жетет Ошондой эле 2025-жылы Эмгек кодексинин аялдар үчүн айрым кесиптерге тыюу салууну жокко чыгарган жаңы редакциясы кабыл алынган.

Кыргызстан гендердик теңчилик жана аялдардын укуктарын коргоо принциптерине бекем кармануу менен Пекин+30 иш-аракеттер платформасын жана Пекин декларациясын ишке ашырууга активдүү катышууну улантат.