Кыргызстандыктарга Орусияда көзөмөлдөнгөн адамдардын реестрине кирсе эмне кылуу керектигин эскертишти

Эмгек, социалдык камсыздоо жана миграция министринин орун басары Бакыт Дарманкул уулу маалымат жыйынында 2025-жылдын 1-январынан тарта чет элдик жарандардын Орусияда жүрүүсүнө жаңы эрежелер киргизилгенин эске салды.

Ага ылайык, убактылуу жашап турууга уруксаты, эмгек же жарандык келишими жок, ошондой эле ишкердик, туризм, коммерциялык, жеке максатта же транзиттик жол менен келген чет элдик жарандар бир календардык жыл ичинде Орусияда 90 күндөн ашык эмес жүрө алышат.

«Бул Россия Федерациясында эмгектик же жарандык-укуктук келишим түзбөстөн жүргөн жана 3 ай сайын кирип-чыккан чет өлкөлүк жарандар мындан ары бул тажрыйбаны колдоно алышпайт дегенди билдирет. Бул эрежелер эмгектик же жарандык-укуктук келишимдин негизинде Россия Федерациясында жүргөн, ошондой эле окууга тапшырган Кыргыз Республикасынын жарандарына жайылтылбайт», – деп түшүндүрдү ал.

Ал белгилегендей, убактылуу чаралар 2025-жылдын 5-февралында да күчүнө кирген, ага ылайык, мыйзамсыз жүргөн чет элдик жарандар үчүн «чыгаруу режими» киргизилген.

«Бул Россиянын аймагында мыйзамдуу негизсиз жүргөн жана өлкөдөн чыгып кетпеген же болууга же жашоого мыйзамдуу негиздерге ээ болбогон чет өлкөлүк жарандар көзөмөлгө алынган адамдардын реестрине киргизилет дегенди билдирет.

Реестрге киргендерге чектөө чаралары колдонулат: кыймылсыз мүлк же транспорт сатып алуу жана сатуу, автоунааны колдонуу, никеге туруу, банктан эсеп ачуу, айына 30 миң рублдан ашык акча которуулар», – деди министрдин орун басары.

Эмгек министрлигинин өкүлү, эгер сиз реестрге кирсеңиз, анда Россиянын Ички иштер министрлигинин аймактык органына жайгашкан жериңиз жөнүндө (анын ичинде геолокация белгиси менен сүрөттү жөнөтүү аркылуу), ошондой эле төмөндөгүлөр жөнүндө тез арада маалымат беришиңиз керек экенин айтты:

• Россия Федерациясынан өз убагында өз алдынча чыгууга тоскоол болгон жагдайлардын келип чыгышы;

• форс-мажордук жагдайда Россиянын Ички иштер министрлигинин аймактык органынын уруксатысыз жашаган жерин өзгөртүү;

• Россия Федерациясынан пландалган өз алдынча чыгуунун күнү, орду жана маршруту.

Белгиленген милдеттерди бир нече жолу (эки же андан көп жолу) аткарбаган учурда, депортациялоо жана атайын мекемеге жайгаштыруу жөнүндө чечим көзөмөлгө алынган адамга колдонулат.