Эмгек министрлигинде мамлекеттик тилди кесиптик чөйрөдө колдонууну кеңейтүү талкууланды

2025-жылдын 26-мартында Кыргыз Республикасынын Эмгек, социалдык камсыздоо жана миграция министрлигинде Жогорку Кеңештин депутаты Г.А. Кожокулова баштаган мамлекеттик тил боюнча жумушчу топ менен жолугушуу болуп өттү. Бул тууралуу министрликтин басма сөз кызматы билдирди.

Жолугушуунун жүрүшүндө министрликтин ишмердүүлүгүндө мамлекеттик тилди өнүктүрүү жана чыңдоо маселелери талкууланды.

Эмгек министри Равшанбек Сабиров жолугушуунун катышуучуларын министрликте бардык документ жүгүртүү толугу менен мамлекеттик тилде жүргүзүлөрүн маалымдады. Мындан тышкары, министрликтин кызматкерлери кесиптик ишмердүүлүгүндө мамлекеттик тилди колдонуу боюнча заманбап ыкмаларды үйрөнүү максатында үзгүлтүксүз квалификацияны жогорулатуу курстарынан өтүшөт. Бул курстар Кыргыз Республикасынын Президентинин алдындагы Мамлекеттик башкаруу академиясы менен түзүлгөн меморандумдун алкагында өткөрүлөт.

Равшанбек Сабиров Кыргыз Республикасынын “Мамлекеттик тил жөнүндө” мыйзамынын нормаларынын так сакталышына туруктуу көзөмөл жүргүзүлүп жатканын белгиледи. Ошондой эле министрлик мамлекеттик тилдин конституциялык макамын чыңдоо жана өнүктүрүү боюнча активдүү иш алып барып жатканын билдирди.

Жолугушуунун жыйынтыгында мамлекеттик тилди расмий документтерде колдонуу үчүн терминдерди, стандарттарды жана котормолорду камтыган ведомстволук терминологиялык сөздүк иштеп чыгуу сунушталды. Бул сөздүк документ жүгүртүүнүн сапатын жогорулатууга жана жарандар менен натыйжалуу өз ара аракеттенүүгө маанилүү инструмент болуп кызмат кылат.