Министр Равшанбек Сабиров 2025-жылдын экинчи жарымына карата артыкчылыктарды белгиледи

Жылдын экинчи жарымы жаңы милдеттерди алып келет: Эмгек министрлиги өзүнүн 100 жылдыгына даярданууда

Жылдын экинчи жарымы жаңы милдеттерди алып келет: Эмгек министрлиги өзүнүн 100 жылдыгына даярданууда
2025-жылдын 1-августунда Кыргыз Республикасынын Эмгек, социалдык камсыздоо жана миграция министрлигинин кеңейтилген коллегиялык жыйыны өтүп, министрликтин 2025-жылдын биринчи жарым жылдыгындагы ишмердүүлүгүнүн жыйынтыктары талкууланды.
Жыйынды министр Равшанбек Сабиров ачып, катышуучуларга, өзгөчө Жогорку Кеңештин Социалдык саясат боюнча комитетинин төрайымы Винера Раимбачаевага колдоосу жана активдүү катышуусу үчүн ыраазычылык билдирди. Министр парламент менен тыгыз кызматташуунун маанилүүлүгүн белгилеп, бул багыттагы аракеттерди мындан ары да күчөтүү зарылдыгын белгиледи.
Өзүнүн сүйлөгөн сөзүндө министр Сабиров төмөнкү негизги өнүгүү багыттарына токтолду:
• 2030-жылга чейинки Улуттук программаны бекитүү жөнүндө Президенттин Жарлыгын ишке ашыруу;
• министрликтин пландарын адамдык капиталды өнүктүрүүгө багытталган стратегиялык максаттарга ылайыкташтыруу;
• программалык документтер менен гана чектелбестен, тиешелүү нормативдик-укуктук актыларды иштеп чыгууга басым жасоо;
• министрликтин 100 жылдык мааракесинин алдында өзгөчө жоопкерчилик менен иш алып баруу;
• демографиялык саясатты күчөтүү.
Мындан тышкары, министр 2025-жылы министрликтин бюджети 20 миллиард сомдон ашканын белгилеп, бул көрсөткүч 2020-жылга салыштырмалуу 91 пайызга жогорулаганын баса белгиледи.
Жыйындын соңунда коллегия мүчөлөрү талкууланган баяндамалардын негизинде сунуштарды берип, министрликтин экинчи жарым жылдыктагы ишмердүүлүгүн жакшыртууга багытталган чечимдерди кабыл алышты. Бул чечимдер социалдык саясаттын натыйжалуулугун арттырууга жана министрликтин иштерин өркүндөтүүгө багытталган.