Кыргызстандын Эмгек, социалдык камсыздоо жана миграция министрлигине — 100 жыл: элге кызмат өтөөнүн жолу
Быйыл Кыргызстандагы социалдык коргоо тармагы 100 жылдык мааракесин белгилөөдө. Эмгек, социалдык камсыздоо жана миграция министри Канат Сагынбаев ведомствонун тарыхы жана өнүгүү жолу тууралуу айтып, бул жүз жылдык тарыхта министрлик чоң өзгөрүүлөргө жетишкенин — эмгек жана социалдык камсыздоо боюнча бөлүмдөрдөн бүгүн миллиондогон жарандарды камтыган заманбап системага айланганын белгиледи.
«Социалдык коргоонун тарыхы — бул адамга кам көрүүнүн тарыхы. Мамлекеттүүлүк түзүлгөн алгачкы жылдардан тарта негизги милдеттердин бири ардагерлерге, майыптуулугу бар жарандарга, карылардын жана оор турмуштук кырдаалга туш болгон үй-бүлөлөрдүн жанына болуу болгон. Бүгүн да биз ошол миссияны улантып, аны адрестүү жана адилеттүү кылууга көңүл буруп жатабыз», — деди Канат Сагынбаев.
Архивдик маалыматтарга ылайык, Кара-Кыргыз автоном облусунун алгачкы Эмгек бөлүмү 1924-жылдын 3-декабрында, ал эми Социалдык камсыздоо бөлүмү 1925-жылдын 6-февралында түзүлгөн. Алардын негизги милдеттери эмгек рыногун жөнгө салуу, жумушсуздукка каршы күрөшүү, эмгекти коргоо, социалдык камсыздандыруу жана мүмкүнчүлүгү чектелген жарандар менен карыларды колдоо болгон.
1926-жылга карата өлкөдө беш карылар үйү иштеп турган — Фрунзеде, Караколдо, Ошто жана Жалал-Абадда. Бул жайларда согуш майыптары жана кам көрүүгө муктаж кары адамдар жашаган.
1927-жылы Кыргыз АССРи түзүлгөндөн кийин Эмгек жана социалдык камсыздоо эл комиссариаттары түзүлүп, кийин бирдиктүү органга бириктирилген. 1946-жылы Кыргыз ССРинин Социалдык камсыздоо министрлиги түзүлүп, бүгүнкү министрликтин түздөн-түз мураскери болуп калган.
Андан кийинки ондогон жылдарда социалдык коргоо системасы бир катар реформалардан өттү. Советтик мезгилде карылар жана майыптуулугу бар жарандар үчүн интернаттардын, протез-ортопедиялык мекемелердин жана өндүрүштүк окуу комбинаттарынын тармагы кеңейген.
Көз карандысыздыкка жеткенден кийин, 1977-жылы Эмгек жана социалдык коргоо боюнча Мамлекеттик комитет түзүлүп, кийин ал Эмгек жана социалдык коргоо министрлигине айланган.
Бүгүнкү күндө Кыргыз Республикасынын Эмгек, социалдык камсыздоо жана миграция министрлиги адрестүү социалдык жардам көрсөтүү системасын, кызматтарды санариптештирүүнү, үй-бүлөлөрдү, улгайган адамдарды колдоону улантууда.
«Биздин максат — ар бир адам мамлекеттин колдоосун сезген, эмгек бааланган жана социалдык коргоо жөн гана жардам эмес, татыктуу жашоонун кепилдиги болгон системаны түзүү. Жүз жыл ичинде көп нерсе өзгөрдү, бирок өзгөрбөгөн эң негизги баалуулук бар — биздин ишибиздин борборунда ар дайым адам турат», — деп баса белгиледи министр Канат Сагынбаев.
