Кыргыз Республикасынын Эмгек министрлиги жашы жете электерди сүрөткө жана видеого тартуу эрежелерин эскертет
Кыргыз Республикасынын Эмгек, социалдык камсыздоо жана миграция министрлиги, балдардын укуктарын жана мыйзамдуу кызыкчылыктарын коргоо боюнча ыйгарым укуктуу мамлекеттик орган катары, өспүрүмдөрдү сүрөткө жана видеого тартууда, анын ичинде шайлоо алдындагы иш-чараларда жана үгүт кампанияларында, Кыргыз Республикасынын мыйзамдарында белгиленген нормаларды так сактоо зарылдыгын эскертет.
Учурдагы мыйзамдардын талаптарына ылайык, өспүрүмдөр сүрөткө же видеого тартылышы алардын мыйзамдуу өкүлдөрүнүн (ата-энелеринин, асырап алуучуларынын), ал эми алар жок болгон учурда — камкорчуларынын жазуу түрүндөгү макулдугу менен гана жүргүзүлүшү мүмкүн.
Бул талап балдардын жеке жана мүлктүк укуктарын коргоого, ошондой эле алардын образын саясий, коммерциялык же башка максаттарда тиешелүү уруксатсыз пайдаланууга жол бербөө максатын көздөйт.
2025-жылдын 10-ноябрынан тартып Кыргыз Республикасынын Жогорку Кеңешине шайлоо боюнча үгүт мезгили башталгандыгына байланыштуу, Министрлик бардык талапкерлерди, саясий партияларды, массалык маалымат каражаттарын жана маалыматтык же агитациялык иш жүргүзгөн башка уюмдарды баланын укуктарын коргоо боюнча мыйзамдардын талаптарын так сактоого өзгөчө көңүл бурууга чакырат.
Өспүрүмдөрдүн сүрөттөрүн жана катышуусун үгүт материалдарында пайдалануу мыйзамдуу өкүлдөрүнүн расмий макулдугу болгон учурда жана укуктук, этикалык нормалардын чегинде гана жол берилет. Бул талаптарды бузуу Кыргыз Республикасынын мыйзамдарына ылайык жоопкерчиликке алып келиши мүмкүн.
Эмгек, социалдык камсыздоо жана миграция министрлиги бардык кызыкдар тараптарды балдардын катышуусундагы коомдук-саясий иш-чараларды чагылдырууда жоопкерчиликтүү жана аң-сезимдүү мамиле жасоого чакырат, балдардын укуктарын жана кызыкчылыктарын коргоону ар дайым биринчи орунга коюу зарылдыгын белгилейт.
