Бишкекте майыптыгы бар адамдардын эмгек укуктарын коргоо боюнча жаңы чаралар талкууланды

15-декабрда Бишкек шаарында «Майыптыгы бар адамдардын эмгек укуктарын ишке ашыруу» аттуу тегерек стол өттү. Иш-чара жумуш менен камсыздоону кеңейтүү жана инклюзивдүү эмгек чөйрөсүн түзүү маселелерине арналды. Жолугушууга мамлекеттик органдардын, эл аралык уюмдардын, иш берүүчүлөрдүн жана эксперттик коомчулуктун өкүлдөрү катышты.

Жыйындын негизги баяндамасы менен Кыргыз Республикасынын Эмгек, социалдык камсыздоо жана миграция министрлигинин орун басары Айнура Орозбаева сөз сүйлөдү. Ал бүгүнкү күндө Кыргызстанда 221 миңден ашык майыптыгы бар адам жашап жатканын, алардын болжол менен 29 миңи иштөөгө даяр жана мүмкүнчүлүгү бар экенин белгилеп, бул өлкө экономикасы үчүн олуттуу эмгек потенциалы экенин айтты.

Талкуунун жүрүшүндө эмгек мыйзамдарындагы өзгөрүүлөргө өзгөчө көңүл бурулду. Жаңы Эмгек кодексинде жумуш орундарын квоталоо механизми кеңейтилди: кызматкерлеринин саны 25тен жогору болгон уюмдар майыптыгы бар жарандар үчүн кеминде 4 пайыз жумуш ордун бөлүп берүүгө милдеттүү, анын ичинде ийкемдүү жана толук эмес иш убактысын караган мүмкүнчүлүктөр да бар.

Ошондой эле иш менен камсыздоо чөйрөсүндөгү мамлекеттик саясаттын конкреттүү жыйынтыктары айтылды. 2025-жылдын 9 айында 221 майыптыгы бар адам жумушка орноштурулду, бул 2020-жылдын ушул эле мезгилине салыштырмалуу дээрлик эки эсеге көп. Кесиптик окутуудан 119 адам өтүп, 225 майыптыгы бар жаран акы төлөнүүчү коомдук иштерге катышты.

Өзүнчө «Социалдык контракт» программасынын натыйжалуулугу белгиленди. 2022-жылдан бери ишкердикти өнүктүрүүгө 48 миңден ашык үй-бүлө колдоо алып, алардын ичинен 3 146сы майыптыгы бар адамдар болду. Бул программа өз алдынча ишкердикти өнүктүрүүгө жана туруктуу киреше булактарын түзүүгө өбөлгө түзүүдө.

Министрдин орун басары инклюзивдүү жумуш орундарын түзгөн иш берүүчүлөрдү колдогон «Чексиз» демилгесинин маанисин белгиледи. Бул демилге үчүнчү жыл катары менен өткөрүлүп келет. Бардык убакыт ичинде 300дөн ашык иш берүүчү өз тажрыйбасын сунуштап, 80 уюм «Чексиз» мыкты иш берүүчү наамына ээ болду.

Иш-чаранын алкагында инклюзивдүү эмгек рыногун мындан ары өнүктүрүү, иш берүүчүлөр менен өз ара аракеттенүүнү күчөтүү жана майыптыгы бар адамдарды колдоо чараларын кеңейтүү боюнча сунуштар талкууланды. Эмгек министрлиги жумушка орноштуруу процессинин бардык этаптарында диалогду улантууга жана колдоо көрсөтүүгө даяр экенин ырастады.