Эмгек министринин орун басары Жогорку Кеңештин көчмө жыйынына катышты

2026-жылдын 3-февралында Курортология жана калыбына келтирип дарылоо илимий-изилдөө институтунун жыйындар залында Кыргыз Республикасынын Жогорку Кеңешинин Эмгек, саламаттык сактоо, аялдар иштери жана социалдык маселелер боюнча комитетинин көчмө жыйыны болуп өттү.

Жыйындын жүрүшүндө мекеменин учурдагы абалы жана ишмердүүлүгү боюнча маселелер каралды. Иш-чарага Кыргыз Республикасынын Эмгек, социалдык камсыздоо жана миграция министринин орун басары Айнура Орозбаева катышып, министрлик менен аталган мекеменин ортосунда түзүлгөн келишимдин негизинде санаториялык-курорттук дарыланууга берилген жолдомолор тууралуу маалымат берди.

Анын айтымында, 2023-жылдан бери түзүлгөн келишимдин алкагында жалпы 1756 жолдомо пайдаланылган. Учурда дагы 272 жолдомо колдонулуп жатат.

Көчмө жыйындын жыйынтыгында мекеменин ишин мындан ары жакшыртуу жана калкка көрсөтүлүүчү кызматтардын сапатын жогорулатуу боюнча бир катар сунуштар айтылды.