Эмгек министрлиги эскертет: эмгек акыны кечиктирген иш берүүчү  айып төлөйт

Кыргыз Республикасынын Эмгек, социалдык камсыздоо жана миграция министрлиги жаңы Эмгек кодексине киргизилген өзгөртүүлөр тууралуу эскертет.

Ведомствонун маалыматы боюнча, айыптын бирдиктүү пайызы белгиленди. Эми иш берүүчү эмгек акыны, өргүү акысын, жумуштан бошотуу учурундагы эсептешүүнү же башка төлөмдөрдү кечиктирсе, ал ар бир кечиктирилген календардык күн үчүн төлөнбөй калган акча суммасынан эсептешүү жүргүзүлгөн күнгө карата кошумча 0,25 пайыз төлөөгө милдеттүү.

Ошондой эле доо коюу мөөнөтү аныкталды. Эгер иш берүүчү эмгек акыны өз убагында төлөбөсө, кызматкердин сотко кайрылып, каражатты өндүрүп алуу үчүн 3 жылдык мөөнөтү бар. Эсептөө эмгек акы төлөнүшү керек болгон күндөн баштап жүргүзүлөт.