Мал чарбачылыгын жүргүзүү үчүн ар бир алтынчы социалдык контракт долбоору иштелди

Социалдык контракт оор турмуштук кырдаалдан чыгуу боюнча аз камсыз болгон үй-бүлөлөргө жардам көрсөтүүнүн жаңы Активдүү чарасы болуп калды. Бул тууралуу Эмгек, социалдык камсыздоо жана миграция министри Кудайберген Базарбаев 2022-жылдын жыйынтыгын чыгарып жатып билдирди.

“Кыргыз Республикасынын Президенти Садыр Жапаровдун демилгеси менен министрлик өткөн жылдан бери жаңы Активдүү чараны ишке киргизип, социалдык контракт түзүп, аз камсыз болгон үй – бүлөлөргө өз ишин ачууга 100 миң сомдон акысыз берип келет. Ийгиликтүү пилоттоштуруудан кийин 100 үй – бүлө-пилоттук социалдык колдоодон баш тартып, киреше ала баштаганда министрлер кабинетинин төрагасы Акылбек Жапаровдун чечими менен үй-бүлөлөрдүн саны 2 800гө чейин көбөйтүлгөн.

Биздин талдоо көрсөткөндөй, социалдык келишим түзгөндөрдүн дээрлик 60% мал чарбачылыгы менен алектенсе, 19% тигүү иши менен алектенишкен. Үй – бүлөлөрдүн дагы 7% ы чакан соода тармагында бизнес ачса, 3% ы тамак-аш жана такси кызматтарын көрсөтүшөт. Брусчатка жасоо, автомобилдерди оңдоо, ширетүү, күнөсканаларды ачуу ж.б. боюнча долбоорлор бар”, – деди министр.

Анын айтымында, социалдык контракттын катышуучулары ишкердик ишмердүүлүктүн негиздери, бизнес-пландарды түзүү боюнча алдын ала окуудан өтүштү. Министрликтин аймактык бөлүмдөрү тарабынан долбоорлордун ишке ашырылышына мониторинг жүргүзүлүүдө.