Урматтуу мекендештер!

Жыл сайын 18-декабрда дүйнөдө Эл аралык мигранттар күнү белгиленет. Бул күндү Бириккен Улуттар Уюмунун Башкы Ассамблеясы 2000-жылдын 4-декабрында жарыялаган.

Кыргыз Республикасы 2003-жылдын 15-апрелинде «1990-жылдын 18-декабрында кабыл алынган бардык эмгек мигранттарынын жана алардын үй-бүлө мүчөлөрүнүн укуктарын коргоо боюнча Эл аралык конвенцияга кошулуу жөнүндө» Мыйзамды кабыл алып, Конвенцияга кошулган.

Глобалдашуу, эркин кыймылдоо мүмкүнчүлүгү жана жашоо шарттарындагы айырмачылыктардын күчөшү мамлекеттердин ичинде жана алардын ортосунда чек аралар аралык миграциянын масштабын көбөйтүп жатат.
Мисалы, постсоветтик мейкиндикте миллиондогон эмгек миграциясы-бул калыптанып калган көрүнүш, аны жокко чыгаруу мүмкүн эмес, бирок мигранттардын укуктук абалын жакшыртууга жетишүү зарыл. Эмгек миграциясына тартылган өлкөлөрдүн миграциялык мыйзамдары жана стратегиялары бул өлкөлөрдүн эл аралык милдеттенмелерине ылайык келүүгө тийиш – өзүнө миграцияга тиешелүү эл аралык укуктун ченемдерин, ошондой эле аларды ишке ашыруунун кепилдиктерин толук камтууга тийиш.

Биздин өлкөдө айрым жагдайлардан улам миграциялык процесстерге көптөгөн адамдар тартылган. Негизинен бул эмгекке жарамдуу курактагы адамдар, алар өздөрүнүн тынымсыз эмгеги менен өздөрү, үй-бүлөлөрү жана өлкөсү үчүн жаңы жашоо курууга умтулуп жатышат. Алардын бардыгы Кыргызстандын өнүгүүсүнө баа жеткис салым кошушуп, жергиликтүү деңгээлдеги социалдык маселелерди чечүүгө көмөктөшүп, социалдык жана башка инфраструктуралык объектилердин курулушуна катышышып, өндүрүштөрдү ачып жана жумуш орундарын түзүшүүдө. Ошондой эле, ушул күнү биз конфликттерден, кырсыктардан же куугунтуктоодон улам үйлөрүн таштап кетүүгө аргасыз болгондорду эстейбиз.

Акыркы жылдары чет өлкөдө иштеп жүргөн кыргызстандыктар Кыргызстанда ар кандай долбоорлорго инвестиция салууга чоң кызыгуу көрсөтүп жатышат. Бул миграция менен өнүгүүнүн ортосундагы байланышты жана ал түзгөн мүмкүнчүлүктөрдү айкын далилдеп турат. Өз тарабынан мамлекет мындай демилгелерди колдоп, бардык зарыл шарттарды түзүүдө. Буга Кыргыз Республикасынын Президентинин 2021-жылдын 29-январындагы №4 «Миграциялык абалды жакшыртууга багытталган чараларды кабыл алуу жөнүндө» Жарлыгынын негизинде иштелип чыгып, бекитилген Кыргыз Республикасынын миграциялык саясатынын 2021-2030-жылдарга карата Концепциясы далил болуп берет.

Бул документ Кыргыз Республикасындагы миграциялык процесстерди жөнгө салуу боюнча узак мөөнөттүү көз карашты билдирет. Концепция миграция, өнүгүү жаатындагы максаттардын, артыкчылыктуу багыттардын жана милдеттердин тутумун камтыйт жана адам укуктары менен эркиндиктерин сактоого, Кыргыз Республикасынын улуттук кызыкчылыктарын коргоого негизделген.

Кыргыз Республикасынын миграциялык саясатынын максаты – адистерди алардын компетенциялары жогорку деңгээлде сыйлана турган дүйнөлүк эмгек рыногуна чыгуу мүмкүнчүлүгү менен камсыз кылуу. Кыргыз Республикасынын Президенти С.Н. Жапаровдун мигранттарды кайтаруу боюнча чакырыгы – жогорку квалификация талап кылган жумуш орундарын түзүүдө. Анда жогорку квалификациялуу адистер кайтып келип, өз мекенинин өнүгүшүнө кызмат кылышмакчы.

Кыргыз Республикасы мамлекеттик органдар аркылуу биздин жарандарыбызды, өзгөчө Евразиялык экономикалык союздун аймагында эмгектенип жүргөн мекендештерибизди колдоо үчүн бардык мүмкүн болгон чараларды көрүп жатат жана көрө бермекчи.

Ошол эле учурда, Кыргызстанда жумуш орундарын көбөйтүүгө жана биздин жарандар үй-бүлөсү, балдары, ата-энелери менен мекенинде жашап, иштөөсүнө шарт түзүүгө бардык аракеттерди жасашыбыз керек. Бул миграциялык процесстерди стабилдештирүүнүн эң жакшы жолу болуп саналат.

Урматым менен, министр Р.А.Сабиров