Урматтуу ишкер айымдар,

Экономика жана бизнестин ар кандай тармактарында өзүн ишке ашыргандардын бардыгын Бүткүл дүйнөлүк аялдардын ишкердик күнү менен чын дилимден куттуктайм!

Бүгүнкү күндө Кыргыз Республикасынын Президенти С. Н.Жапаровдун демилгелеринин жана Кыргыз Республикасынын Министрлер Кабинетинин чечимдеринин аркасында, , ишкердик тармагы гендердик теңчиликке туруктуу умтулгандыгын көрсөтүп турат. Акыркы жылдары орто жана ири бизнестеги аялдардын саны кыйла өстү. Чакан бизнес деңгээлинде социалдык контракт программасы аркылуу гана аз камсыз болгон үй-бүлөлөрдүн 30 миңден ашык аялдары өзүн жеке ишкер катары ишке ашырышты.
Белгилей кетсек, Кыргызстандагы ишкер айымдар үй-бүлөнүн бакубаттуулугун жогорулатып, экономикага салым кошуп гана тим болбостон, көптөгөн жарандарга оор турмуштук кырдаалдан чыгууга, кошумча жумуш орундарын түзүүгө жана биринчи кезекте аялдарды жумуш менен камсыз кылууга көмөктөшөт. Анын үстүнө бүгүнкү күндө мамлекетибиздин туруктуу өнүгүүсүнүн негизи болууга багытталган “жашыл экономиканы” өнүктүрүүгө ишкер аялдар эбегейсиз салым кошуп жатышат. Эң негизгиси адамдык капиталдын өнүгүшүнө салым кошууда.

Аялдардын лидерлиги үчүн экономикалык мүмкүнчүлүктөр азыр саясий колдоого ээ болууда. Мамлекет башчысынын демилгесинин аркасында өлкөдө Аялдардын лидерлигин колдоо боюнча мамлекеттик программа кабыл алынды, ал ишкер аялдарга чечимдерди кабыл алуу чөйрөсүндө – мамлекеттик кызматта өзүн ишке ашырууга мүмкүнчүлүктөрдү ачат.
Биз аялдардын ишкердигин өнүктүрүүнү колдойбуз жана сиздердин потенциалыңызды ишке ашыруу үчүн жагымдуу шарттарды түзүүнүн үстүндө иштейбиз. Ар бир ишкер айым келечекке ишенимдүү карай, өз долбоорлорун өнүктүрүп, өлкөбүздүн экономикасын чыңдай алышына умтулабыз.
Бардык ишкер аялдарга чексиз энергия, жаңы идеялар жана өсүү үчүн мүмкүнчүлүктөрдү каалайм. Ар бир кадамыңыздар ийгилик жана бакубатчылык алып келсин, үй-бүлөңүздүн, кесиптештериңиздин колдоосу сизди жаңы ийгиликтерге шыктандырсын.
Урматтоо менен,
Эмгек, социалдык камсыздоо жана миграция министри, Жылдыз Полотова